Shaped Poem

Immature nga Maestro

Kang mga nagriligad nga sinimana daw tama guid ka init kanakun. Nakig-away ako sa akun instructor. Maen, indi man guid ako para-away mung. Sa tuod lang nga istorya talawit takun. Garing hay daw napuno run guid ako.

Hamakun mo nga halin sa umpisa kang amun lesson pirme naba ang buol namun sa exams. Hasta nga inugtapos kang summer class naba gihapon buol namun sa exams. Indi lang naba hay daw haros tanan wara kapasar sa cut off nga 50/100. Kay man 100 item test bay…long test lang riah. Sala set timu eh.

Sa pamatyag mu kun amu pirme riah ang sitwasyon nga gamay lang ang gakapasar sa exam, may problema ayhan sa mga estudyante? Nagatu-on man kami. Pamatyag ko teacher factor guid tana riah. Sa una pa lang man-an ron ka instructor nga poor ang performance kang students sa exam dapat gintun-an na kun paanu ang mayad na nga himuon. Garing hay daw nalipay pa tana nga duro ang wara kapasar. Iban tana siguro nga professional teachers gapamosa kun naba scores ka students na. Baw ana tana kadya daw nalipay pa.

Anu kay daw pinalagpat ang paghimu kang exams. Daw wara naga-konek sa ginpang-discuss namun. Ang problema pa kay departmentalized ang exam. Meaning to say, indi lang ang amun instructor nagahimu kang exam kundi pati ang instructor sa pihak nga section naga-cointribute man sa exam. Although nga parehas ang syllabus kag parehas ang approach kang lesson, iba gid tana mung ang comprehension namun sa lesson kumpara sa pihak nga section. Information gap.

Gane nag-init ulo ko hay indi ako satisfied sa score ko nga 79/100. Nag-comment ako nga daw pinalagpat ang exam ni Ser.
Aiteh, imbyerna si manenoy. Ginpatawag na ako kag ginhambalan nga amu kadya: “Kung merun kang grievances sa amin, dapat lapitan mo kami. Hindi yung nagko-comment ka dyan. You’re lambasting us. Nagiging unethical ka na.”

WHat?! As a student, may katungdanan takun nga magreklamo noh. How dare him to call me unethical. Wara takun namuyayaw kana. Lambasting? I wasn’t even scolding. Unethical? Wrong usage.

Daw Di Mainchindihan!

Hay maan lang ah, natak-an ako sa nagakaratabo sa UA. Hasta kadya wara gihapon gintugro ang ID kang mga freshmen hay kunu wara pa gin-apprubahan ang logo na. Abaw ah! Nag-ilis lang ka ngaran na nga PSCA to UA pati logo na islan man? Daw wara bala paagtunan tanda. Teh anu ran hay ang square nanda nga logo gin-print ron sa mga uniforms kang students? Teh islan liwat ri-ah? Ahay ah…. daw di man eh pwede. Daw ka-inconsistent kang school ah. Antique’s Pride man daad garing hay daw indi amu. 

Lantawa bla ang bag-o nga square nga logo nanda, daw logo kang kindergarten school. HAHAHA! Andut abi nga square gd? Anu ja influenced by Spongebob, Squarepants? LOL

Mga Hisaon !!!!

Duru run kadja akun nabati-an nga mga Western Songs nga ginbuhatan ka version ja sa Pinas. Baw ah, wara ron gid haw tanda mapinsaran nga iba…nga pwede bala nanda haw ma-compose kag matawag nga Original Pinoy Music. Sayud man tana ra nga kanta kang mga Kano kantahon mo man kag ipa-tokar mo dya sa Pinas. Sara jan kara si MISS GANDA. Araguy nalaimnanan takun mamati kang version na ka CLUMSY ni Fergie. Ano tana ra man?

Aiteh

baw ah..

daw buhay buhay ron guid nga wara ko ka-update kadya nga blog bah.

busy beh mung

kapin pa hay election bay.

teh kumusta kamu. baw may gabisita man didya sa blog ko?

daw pan-os ron dya haw?

Sabaka gani

Kondoktor: Sakay ron hay mapanaw ron ang dyip.

Pasahero: To, may dara ko opa kang baboy.

Kondoktor: Sa baka ra.

Pasahero: sa baboy tana dya!

Kondokto: Sa baka ra!

Pasahero: Sa baboy tana dya gani!

Kondoktor: Sa baka ra gani!

Pasahero: Daw sa gagu-gagu kaw. Sa baboy dya!

Kondoktor: bang-aw. sa baka ra gani!

Pasahero: dipuga kaw. Opa pakaon mo sa baka?

Kondoktor: Yudipuga kaw man. man-an mo nga gutok ron. Sabaka ra gani!

Ay aning. Sabakon kunu hambal ka kondoktor. Wara kamo mag-intsindihanay.

:)

dyok dyok lang ra

Its Dyok Taym!

Bata: Balay! Bakal ko  bagulgam.

Tindero: wara kami bubblegum gol.

 (pagsunod nga adlaw..)

 Bata: Balay! bakal ko bagulgam.

Tindero: wara gani! tiruhon ta kaw karon!

(pagsunod nga adlaw)

Bata: Tagbalay!

Tindero: oh, anu ruman?!

 Bata: May pusil kamo?

Tindero: Wara!

Bata: Aw ah. Teh bakal ko bagulgam!

 

HAHAHAHA! Binutig timo sa bata, ngita gid tana ra ka lalang nga mabu-ol na gusto na.

Ninja Saga sa Peysbuk

Dya ruman tatun. Na-adik duman ako kang Ninja Saga nga dya. Awat. Bisan gasakit mata ko kamulalung sa computer sige lang gihapon ah. Nami ja nga sipal. Himo kaw character mo nga ninja kag tun-an mo ang mga chakra para gamiton sa pag-away.

Hay. Lipatan ko wara pa gali ako kayapon. Nabuyo takun ka sipal. Yugz. May Farmville pa ko nga bistahan karun. My Restaurant City pa ko..wara ko pa mabistahan restaurant ko basi luno ron to mga workers ko. Busy gid ko kadya. Yapon ko anay….

Langka Baboy Cadyos

Nadumduman ko anay sa Tike gamay pa ako, hilig si Nanay magraha kang laswa labi na gid kun tag-irigma. Sara sa mga nanamitan ko nga raha na ang ginat-an nga tambo nga ginlaktan kang tagabang kag kuritot nga ginpanagyap sa suba. Basta amu gani ja dapli perti gid higop ko. Kapin pa kay may tagabang, abaw, medyo daradanlog gawa. Sara pa gid sa pinakapaborito ko ang ginat-an nga dagmay, ilabi na gid kun rabu-rabo ang dagmay.

Pero ang indi ko gid malipatan kag ginahandum-handom ko gid nga matirawan liwat ang ginat-an nga kadyos nga ginlaktan kang langka nga ginlangkayan kang baboy. Amu ja kauna ang ginatawag namun nga LBC ukon Langka Baboy Cadyos.

Pag-uli ko sa Tike i-request ko gid kay Nanay nga maraha tana kaja sa tag-irigma. Hidlaw ron gid takun maghigop ka sabaw kang Langka Baboy Kadyos nga dya.

Adik Takun sa Farmtown

 Isara sa mga rason kun andut pirme ako gatambay sa peysbuk ang Farmtown. Watay, nalingaw lang   gid takun  mag-design kang akun farm. Lantawa lang balah ang elevated waterfalls ko ngan. Bastante ra gol, bisan daw peke lantawon pu daw tuod man, haha!.

Ag di lang manami sa Farmtown kay hingalit lang mag-disconnect sa server. Abi mo human dun obra muh, ay gali wara pa tana na-save..balik timu sa umpisa. Daw uripon lang eh.

Pro hay, wara kaso. Sadyahan lang ko maglantaw sa obra ko ah. Pamatay oras bala haw. Imbes nga magsagad turog,        himo ta kang lalang nga malipay ta bisan sa gamay ga pamaagi. HAmbal Tita ko ana dya kunu ka bata iki nga obra. Ahay, tingala ko man nga mga Farmtown neighbors ko mga kwarentahun dun hay. Hampang gali dya ka bata iki? HAmak timu kara. Kalma lang balah Tita.

Ay sa mga neighbors ko gali dyan, untati nyo ko kata-o kang mga sapat. Wara tana pulos ran, tugru-e nyo lang ko mangga kag saging ah,hehe.

:) 

Mga Buyon

Prangkahanay ta balah.

May nabasahan abi ako kaina to sa sangka discussion board sa peysbuk, nga under man sa Kinaray-a Fan Page.

Amu guid dya nabasahan ko ay:

ay maan ano topic ninyo haw???daad may mga topic ja nga idiskusyunan ta heheheh, sadya daad bah..

mahambal lang ta kiniray ah bisan ano hahahhaha..ano tana ja man..

geh ako matao topic… amo ja hu, ang iba maka adto gani sa ibang lugar indi dun kamaan mag kiniray ah..kahuruya di bala,man an man ka tawo nga sa antique nagbahol,,kag ang iba mayha nga sa antique ana probinsya hay duro aswang…hambal sanda taga iloilo kuno hay daw sosyal gawa kun taga iloilo???kahuruya kamo!!!di kamo mayha sa kalag ninyo???aq tana proud q nga taga antique ako bisan ano matabo bisan diin pa ako mag agto….

mas duru tana guru aswang sa lilo. ahaaaaaaaaayteh mayha ran e tanda maghambal nga taga-tike hay wra bay city sa atun. di priho sa lilo syudad tana to ah. pro 2od tana mimu ran, kaabot gani xa manila di ron tana kmaan magkaray-a ah. kramayha sa many people gatagalog nga kray-a accent na.

hala! daw laban-laban gid dya bay. Teh anu tana ang aswang isyu nga ran? Daw indi manami tana ran nga i-aasociate ang province ta sa aswang ek-ek nga ran noh. Bisan diin may aswang haha. Lain lang garing tana anda tawag karan. Pro lain man tana akon, daw tood gid man ra nga may mga mega kag mego kita nga  masalapu-an mo sa manila, mangkuton mo gani kon taga-diin, sabatna taga-lilo. Ayteh wanun ta ran hay indi tanda proud kang Tike. Di lang pagpirita. Paminsara lang dya balah:

“Ang taong hindi marunong lumingon sa pinanggalingan, siguradong hindi makakarating sa finish line.”

Hehehe. Pira ka adlaw makadasma ria, guwa kara kinaray-a sa baba na.

Hamak timo kara?

Bertdi Ko Kang Sabado

Kasan-o lang naghiwat ako kang akun bertdi.

Baw masadya man hay raku man ko ginpakaon haha. Muh gid dya ang masadya sa tanan. Kun diin gani may okasyon sigurado didto tanan tumpukan ka mga tawo. Sadya-sadya gid ko beh hay raku-raku tawo nag-agto sa balay. Raku man regalo nabatun ko.

Ang mga tawo nga wara ko gina-ekspektar nga mag-abot, nag-arabot. Baw ah, teh perti kagahud sa balay eh. Kapin pa hay nag-arabot mga pakaisa ko nga mga laway. Tam-an gid ka mga ulibadun. Pero sadyahan gid ko. Pasalamat lang gid ko sa Tita ko. Tana ang Budget Officer ko hehe. Kag pasalamat man ko kay Bro eh, nakaabot pa man ko sa amu dya nga pang-edaron. Salamt gid Bro!

Uran-uran

Gauran-uran gid.

Basta amo dya gani ang tsura kang panahon daw nami lang maligid-ligid kag magpaminsar kang mga manami nga bagay.

Pero kalabanan kun gainuran gani nami lang magdurop kaon noh. Wara gid ako it mapinsaran nga himuon kaja. Baskug uran sagwa. Gaambi tana dya sa kwarto ko. Perti karamig. Ang mayad, maraha kang instant cup noodles kag magbira ka higop-higop. Busog kaw ron, pamalhasan kaw pa ka todo-todo. Teh dura ramig eh. Ang madayun kadya, masipal ka Farmville sa Facebook. Ma-pretend lang ta nga kunu abi nagapanguma. haha. Kunu abi lang eh, atlis dya nimo kadya mapamatud-an nga sagad kaw manguma. Di man takun gani kamaan mag-arado kag magtanum. Lipay lang ko hay may Farmville ah, praktis ta pananum.

Teh, bistahan ko to anay uma ko.

Umpisahan ko sa Pagkinaray-a

buhay ko ron ginapaminsar nga maghimo ako kang sangka blog nga Karay-a ang lenggwahe ang akun gamiton sa akun mga posts. SA darwa ka tuig ko nga pag entra-entra sa mga blogs nga dya daw gamay pa lang ang akun nasalapu-an nga mga blogs nga nagagamit it kinaray-a nga dialect.

Gani napinsaran ko nga umpisahan ko man ang akun pagpalayag sa akun blog gamit ang dialect nga akun nabutwaan.

Gusto ko lang ipabutyag ang akun mga hibubun-ot kag bisan anu nga mga bagay nga akun nadumduman kag gusto ko isulat paagi sa sangka lenggawahe nga komportable ako.

Teh umpisa kadya, makinaray-a ron takun. Pasensya lang sa mga makasalapo kadya nga blog kun indi tinyo kaintsindi teh pabay-e lang. Labay lang kamu. Basta makaray-a takun. Teh kun kaintsindi ikaw, basaha lang ah. Indi mo lang pagmuyaan ukon hikayan ha. 

Himu-on ko lang ang akun masarangan eh para may madangatan man dya nga blog. Laban-laban guid ang content na kadya puros random. Kun anu lang madumduman ko nga pwidi ko i-share ah. 

Kabay pa nga duro pa nga posts ang akun iga-post didya.

Hala sige, makinaray-a kita. Garagumu lang dya!